E premte, 4 dhjetor 2020
Fjalimi i Kryetarit Xhaferi në seancën konstituive të Klubit të Çështjeve dhe Politikave Rinore
Të nderuar koordinatorë të grupeve parlamentare,
E nderuar sekretare e përgjithshme Ivanova,
Të nderuar kolegë më të ri deputetë dhe të gjithë që ndjeheni të ri,
Të nderuar përfaqësues të organizatave rinore,
Të nderuar përfaqësues të Fondacionit të Demokracisë të Vestminsterit,
Të Institutit Nacional Demokratik,
Zonja dhe zotëri,
Gëzohem që sot, dy muaj pas Takimit të punës për deputetë, që në fakt ishte hyrje në rolin dhe funksionin e Klubit të çështjeve dhe politikave Rinore, Ju, kolegë të mi të dashur të ri, kuptohet, me ndihmën pa rezervë të miqve tanë të dashur nga Fondacioni i Demokracisë i Vestminsterit dhe Institutit Nacional Demokratik, sot e mbani seancën konstituive të Klubit të përbërjes së re parlamentare. Më vjen mirë që mundem si i pari ndër të barabartët, të përshëndes këtë akt dhe t'ju uroj të keni mandat me të vërtetë të frytshëm dhe të suksesshëm, a keni edhe bazën solide për të bërë këtë. Siç thashë edhe gjatë takimit të punës, këtu mendoj për Ligjin për pjesëmarrje politike dhe politika rinore që u miratua me mbështetjen e të gjitha grupeve parlamentare në Kuvend në janar të vitit 2020, mendoj për rezultatet nga puna e klubit paraprak në drejtim të promovimit dhe përfaqësimit të interesave rinorë në evenimentet ndërkombëtare dhe me vetë këtë, aktualizimin e Klubit, dhe në formimin e Rrjetit Rajonal në Parlamentet e Ballkanit Perëndimor të Klubeve Rinore, qëllimi i të cilit është ndërlidhja e të gjithë klubeve që agjenda 
rinore të vihet lartë në prioritetet e Unionit dhe të vendeve të Ballkanit Perëndimor. Krahas kësaj, zyrat bilaterale rinore të bashkëpunimit, të cilat janë edhe pjesë dhe obligim i implementimit të Marrëveshjes së Prespës, janë impuls dhe energji plotësuese për vendosjen e bashkëpunimit intensiv të ndërsjellë të të rinjve nga fqinjësia, rajoni dhe më gjerë. Kështu që, ju sugjeroj ti shfrytëzoni të gjitha mundësitë që i keni në dispozicion, të jeni të hapur, të vazhdoni të koordinoheni dhe të informoheni me institucionet rreth obligimeve të krijuara nga Ligji për pjesëmarrjen rinore dhe politikat rinore, për atë nëse kanë sukses në zbatimin e tij ashtu si është miratuar, nëse hasin në vështirësi, mos ketë vallë nevojë për të bërë ndryshim apo plotësim me qëllim të përshtatjes ndaj situatës në terren, për arsye se kuptohet, jo çdoherë teoria përkon me praktikën, a përveç kësaj, situatat ndryshojnë, nevojat ndryshojnë. Prandaj është i rëndësishëm roli juaj si ligjvënës, të jeni lidhja që i bashkon të gjitha palët e prekura, që rezultati përfundimtar të jetë në dobi të të gjithë të rinjve. Bëhuni zëri i tyre, mbështetja dhe dera në të cilën do të mund të trokasin lirshëm dhe të ndajnë problemin e vet.
Kolegë të dashur,
Për fat të keq, situata me pandeminë e KOVID-19, rreziqet ndaj shëndetit të qytetarëve tanë, ndikimi negativ mbi sistemin shëndetësor dhe ekonomik, mirëpo, edhe pasojat e përhershme që do i lë mbi mënyrën e jetës, punës, shoqërimit dhe funksionimit të gjithë botës për shkak të protokolleve të domosdoshme shëndetësore për të cilat i ndryshojmë shprehitë, mënyrat e funksionimit dhe bashkëpunimit, besoj se i keni tani më një përditshmëri të vendosur. Duhet të mësohemi të pranojmë këtë si një realitet të ri, respektivisht të reduktojmë prezencën fizike në minimum dhe të praktikojmë dhe preferojmë zhvillimin virtual të komunikimit, që në anën tjetër, ka një përparësi shumë të madhe, gjegjësisht, mundësia për shtrirje deri te target grupet shumë më të mëdha, dhe me vetë këtë, ndarjen, informimin dhe përhapjen e përvojave pozitive, bashkëpunimeve, evenimenteve dhe nismave. Gjithsesi, edhe mbështetja që mund të fitohet është shumë më e madhe në këtë rast. Prandaj, shpresoj se në Programin e ri të punës së Klubit të Çështjeve dhe Politikave Rinore, do të kushtoni hapësirë dhe vëmendje të mjaftueshme për këtë situatë aktuale dhe se aktivitetet e juaja do i orientoni në drejtim të ndërtimit të klimës pozitive për punë, me qëllime të harmonizuara dhe bashkë të arritura për përmbushje në periudhën e ardhshme të punës së Klubit.
Të nderuar kolegë,
Më lejoni t'ju përgëzoj për konstituimin dhe t'ju uroj të arrini rezultate të lakmueshme në përmbushjen e të drejtave të të rinjve, bëhuni inventiv dhe hulumtoni mënyrat më të ndryshme të arrini te të rinjtë dhe të afroni Klubin e Çështjeve dhe Politikave Rinore te ato. Bëhuni shembull i mirë edhe për to, edhe për ne, kolegët më të moshuar në Kuvend, ndërsa ne do të jemi pranë jush gjatë çdo hapit tuaj të ardhshëm dhe nisme të ndërmarrë.
Ju uroj punë të suksesshme dhe të frytshme!
Ju faleminderit për vëmendjen!