E premte, 25 mars 2011
MAQEDONIA TË VAZHDOJË NË RRUGËN E DEMOKRACISË PARLAMENTARE
Kryetari i Grupit parlamentar të Kuvendit të Republikës së Maqedonisë për bashkëpunim me Parlamentin e Republikës së Turqisë, Z. Kenan Hasipi dhe anëtarët: Z. Cvetko Grozdanov, Z. Andrej Zhernovski, Z. Avdija Pepiq dhe Z. Nazif Bushi, sot realizuan takim me ministrin e Çështjeve Evropiane dhe negociuesin kryesor të Republikës së Turqisë, Z. Egemen Bagish.
Në përbërje të delegacionit turk ishin edhe: SH.T. Guroll Sokmensuer, ambasador i jashtëzakonshëm dhe fuqiplotë i Republikës së Turqisë në Republikën e Maqedonisë dhe Z. Halluk Illiçak, ambasador, sekretar i përgjithshëm për çështje evropiane në BE.
Në takim, Z. Hasipi e përshëndeti praninë e delegacionit turk, dhe shprehu falënderim të madh që përfaqësuesit e pushtetit ekzekutiv të Turqisë realizojnë takim me Grupin parlamentar për bashkëpunim në Parlamentin e Republikës së Maqedonisë, duke i dhënë me këtë rëndësi më të madhe demokracisë parlamentare.
Kryetari Hasipi i përmendi marrëdhëniet e mira dhe stabile ndërmjet këtyre dy vendeve mike, të cilat i karakterizon shkalla e lartë e tolerancës dhe mirëkuptimit. Njëherazi, ai përkujtoi se Republika e Turqisë e para njohu pavarësinë dhe sovranitetin e Republikës së Maqedonisë dhe u angazhua për përdorimin e emrit të saj kushtetues në të gjitha platformat ndërkombëtare, e para hapi ambasadë në Republikën e Maqedonisë dhe emëroi ambasadorin e saj, ndërsa mbështetja e fortë dhe jovetiake erdhi në shprehje edhe në kohën e Samitit në Bukuresht.
Ministri për Çështje Evropiane dhe negociuesi kryesor i Republikës së Turqisë, Z. Egemen Bagish, theksoi se është përgjegjësi e madhe të jetë i pranishëm në vend miqësor dhe vëllazëror si Republika e Maqedonisë, në Parlamentin i cili është shprehje e popullit të Maqedonisë, duke shprehur kënaqësinë e tij personale që në Grupin parlamentar për bashkëpunim janë të qasura të gjitha partitë politike, siç është edhe rasti me Grupin parlamentar për bashkëpunim në Kuvendin e Madh Popullor të Republikës së Turqisë.
Ai shtoi se njohja e pavarësisë dhe hapja e ambasadës, është hap me të cilin krenohet Republika e Turqisë dhe se në të ardhmen do të vazhdojë t’i jep mbështetje të plotë Republikës së Maqedonisë në të gjitha platformat ndërkombëtare, duke i pasur parasysh problemet e njëjta me të cilët ballafaqohen të dy vendet në rrugën drejt integrimit në BE dhe NATO.
Përveç bashkëpunimit politik, këto dy vende i karakterizon edhe bashkëpunimi në fushën e mbrojtjes, punëve të brendshme, shëndetësisë, sportit, etj. Republika e Turqisë, gjithashtu, është partner i rëndësishëm tregtar, duke kuotuar lartë midis dhjetë vendeve të para të cilët kanë shkëmbim të lartë tregtar me Maqedoninë, ndërsa numër i madh i përmendoreve në vend janë tregues të lidhjeve të forta kulturore dhe historike ndërmjet dy vendeve dhe ruajtja e tyre është me rëndësi të madhe.