Четврток, 27 октомври 2011 година
Наградата „Сахаров” за „Арапска пролет“
Петмината активисти од „Арапска пролет“ се добитници на овогодинешната награда „Сахаров”, која ја доделува Европскиот парламент за слобода на мислата. Лауреатите се: Мохамед Буазизи од Тунис, кој е награден постхумно, Асма Махфуз од Египет, либискиот дисидент Ахмед ал Зубеир Ахмед ал Сануси, сирискиот адвокат Разан Зајтоунех и карикатуристот Али Фарзат, исто така од Сирија.
„Овие поединци придонесоа за историски промени во арапскиот свет, а оваа награда ја потврдува солидарноста на Парламентот и силната поддршка за нивната борба за слобода, демократија и крај на авторитарниот режим. Нивната награда е симбол на сите оние кои работат за достоинството, демократијата и основните права во арапскиот свет и надвор од него“, изјави претседателот на Европскиот парламент, г. Јержи Бузек..
Групата „Арапска пролет“ победи во тесна конкуренција со финалистите: г. Дмитри Бандаренка - граѓански активист и член на Белоруската асоцијација на новинари и Заедницата за мир Сан Хосе де Апартадо - колумбиска заедница на селани.
Наградата „Сахаров“, која е наречена во чест на советскиот физичар и политички дисидент Андреј Сахаров, Европарламентот ја доделува од 1988 година на поединци или организации кои придонеле за правата на човекот и демократијата.