2012



Вторник, 28 февруари 2012 година, Викторија, Австралија

Претседателот на Собранието на Република Македонија, г. Трајко Вељаноски оствари средби со претставниците на Македонската заедница

Претседателот Вељановски, во текот на денот, оствари средба и со претставниците на Советот на Македонската заедница во Викторија, од чија страна беше информиран за активностите на Советот кои се насочени кон признавање на Република Македонија под уставното име од страна на Австралија, обединување на сите Македонци во Австралија, како и активно вклучување на Македонците во политичкиот живот на Викторија, а подоцна и на федереално ниво. Исто така, претставниците на Советот го инфомираа претседателот Вељаноски за новиот состав на претседателството, кој брои 15 члена - од кои 10 се нови членови, претставници на организациите кои членуваат во Советот



Вторник, 28 февруари 2012 година, Викторија, Австралија

Средба на претседателот, г. Трајко Вељаноски со поддржувачите на иницијативата за формирање на Група за соработка меѓу Парламентот на Викторија и Собранието на Република Македонија

Господин Ендру Елсбери истакна дека ќе продолжи со консултациите со претседавачите на Парламентот на Викторија и ќе побара совет и мислење од парламентот на Западна Австралија во кој веќе има формирано Група за соработка со Македонија. „Потребно е да се формира група за соработка со Собранието на Република Македонија, и истото треба да се случи што е можно поскоро“, истакна г. Елсбери



Понеделник, 27 февруари 2012 година

Претседателот Вељаноски во официјална посета на Австралија

Претседателот на Собранието на Република Македонија, г. Трајко Вељаноски, од денеска е во петдневна официјална посета на Австралија. Претседателот Вељаноски ја предводи Делегацијата составена од: г. Илија Димовски, претседател на Парламентарната група на Собранието на Република Македонија за соработка со Парламентот на Австралија и членовите на Групата: г. Џеват Адеми, г-ѓа Цветанка Иванова, како и г. Милорад Додевски, член и претставник на Македонската дијаспора од Австралија



Вторник, 21 февруари 2012 година

СРЕДБА НА ПРЕТСЕДАТЕЛОТ ВЕЉАНОСКИ СО ЕВРОПРАТЕНИЦИТЕ И „ПРИЈАТЕЛИ НА МАКЕДОНИЈА“, РИЧАРД ХОВИТ, ЕДУАРД КУКАН И АЛОЈЗ ПЕТЕРЛЕ

На средбата, претседателот Вељаноски се осврна на досегашната работа на Собранието на Република Македонија и потенцираше дека Собранието во континуитет, веќе трета година, од ЕУ добива позитивна оценка за напредокот, дека се одвива политичкиот дијалог и дека сите субјекти во Република Македонија се залагаат за што побрзо евроинтегрирање

Среда, 8 февруари 2012 година

Средба на претседателот Вељаноски со амбасадорот на Република Романија, г. Фокша Јустинијан

Претседателот на Собранието на Република Македонија, г. Трајко Вељаноски, денеска оствари протоколарна средба со новоименуваниот амбасадор на Република Романија, г. Фокша Јустинијан.

Претседателот Вељаноски, посакувајќи му успешен мандат на новоименуваниот амбасадор, истакна дека меѓу Република Македонија и Република Романија нема отворени прашања, што е добра основа за развој на билатералните односи на сите нивоа.

Соговорниците се согласија дека парламентарната соработка и на ниво на претседатели и на ниво на комисии и пратеници треба да ја одбележи 2012 година, како продолжение на билатералната соработка на ниво на претседатели на држави.

Амбасадорот Јустинијан Фокша ја повтори поддршката на Република Романија за евроатлантските интеграции на Република Македонија. 



Среда, 11 јануари 2012 година

Средба на претседателот Вељаноски со Турско-македонската меѓупарламентарна група за пријателство на Големото национално собрание на Република Турција

Претседателот на Собранието на Република Македонија, г. Трајко Вељаноски, на денешната средба со Турско-македонската меѓупарламентарна група за пријателство, го истакна континуитетот на високо развиените односи меѓу двете држави, како во сферата на политичките односи, така и на полето на економската соработка



Вторник, 10 јануари 2012 година

Средба на претседателот Вељаноски со претседателот на Владата на Република Косово, г. Хашим Тачи

„Како одговорни политичари кои сме на чело на конкретни институции, мораме во рамките на нашите надлежности да создаваме услови за натамошен развој на економската соработка. Верувам дека бизнис заедницата и на Република Македонија и на Република Косово од нас тоа го очекуваат, бидејќи досегашното искуство покажува дека за ова има голем интерес. Во тие рамки таа соработка треба да добива нови и повисоки форми, а и да ги опфати сите сфери од енергетиката, инфраструктурата, туризмот“, рече претседателот Вељаноски



Вторник, 10 јануари 2012 година

претседателот Вељаноски оствари средба со претседателот на Република Косово, г-ѓа Атифете Јахјага

Претседателот Вељаноски особено го истакна позитивниот тренд во билатералните односи меѓу двете држави во сите сфери. Во тие рамки е и денешната посета на Делегацијата на Македонското собрание и разговорите со колегите од Косовскиот парламент, која ќе даде импулс за натамошен развој на односите меѓу двете држави



Вторник, 10 јануари 2012 година

Средба на претседателот Вељаноски со претседателот на Собранието на Република Косово, г. Јакуп Красниќи

Имајќи предвид дека ова е прва средба на ниво на претседатели на парламенти, претседателот Вељаноски истакна дека таа ќе даде позитивен импулс во натамошниот развој на целокупните односи, посебно на соработката помеѓу двата парламенти. Македонското собрание е подготвено со своите колеги од Косовското собрание да ги сподели сите искуства како во процесот на евроинтеграциите, така и на градење на ефикасни и функционални институции