E mërkurë, 23 shkurt 2022
PJESËMARRJA E DELEGACIONIT TË AP-së së NATO-s NË MBLEDHJET NË BRUKSEL
Asambleja Parlamentare e NATO-s, nga 21 deri më 23 shkurt 2022, në Bruksel, në kuadër të aktiviteteve të rregullta, i mbajti mbledhjet e përbashkëta të komiteteve të saj. Në këtë eveniment, ku morën pjesë delegacionet nga vendet anëtare të NATO-s, Kuvendi i Republikës së Maqedonisë së Veriut si anëtar i plotfuqishëm u përfaqësua nga Delegacioni i përbërë nga: Arta Bilalli-Zendeli, shefe dhe anëtarët Ilija Nikollovski dhe Antonijo Milloshoski.
Evenimenti u dominua nga diskutimi mbi situatën aktuale në Ukrainë dhe fqinjësinë e saj të afërt, e cila u karakterizua si sulm i drejtpërdrejtë ndaj shtetësisë dhe demokracisë së saj. Parlamentarët riafirmuan njëzëri mbështetjen e tyre të fortë për sovranitetin e saj, integritetin territorial, të drejtën e vetëvendosjes për anëtarësim në organizatat ndërkombëtare dhe të ardhmen e saj euroatlantike. Gjithashtu, u theksua se çdo shkelje e sovranitetit të saj duhet të shoqërohet me sanksione serioze nga vendet anëtare të Aleancës dhe nga Bashkimi Evropian.
Shefja e Delegacionit, Arta Bilalli-Zendeli, si anëtare e Komitetit të Përhershëm të AP-së së NATO-s, mori pjesë në mbledhjen me Këshillin e Atlantikut të Veriut të NATO-s, ku u shkëmbyen mendimet për zhvillimet aktuale në Ukrainë dhe fqinjësinë e saj të afërt, si dhe mbi prioritetet për Konceptin e ri Strategjik që do të miratohet në Samitin e Aleancës në Madrid këtë vit.
Debati për kontributin e Asamblesë Parlamentare të NATO-s në Konceptin Strategjik vazhdoi në mbledhjen e Komitetit të Përhershëm të NATO-s, ku u konstatua nevoja në rritje për përgjigje të përshtatshme ndaj sfidave në rritje të orientuara drejt qëndrueshmërisë së shoqërive tona. Rekomandimet e Asamblesë janë miratuar me konsensus si kontribut në këtë dokument, të cilat duhet t'i dërgohen NATO-s dhe të merren parasysh përpara miratimit përfundimtar. Është mirëpritur veçanërisht mbështetja e konsiderueshme e vendeve anëtare për themelimin e Qendrës së NATO-s për Rezistencën Demokratike, iniciativë e Presidentit Konoli, e cila duhet të saktësohet në mënyrë që të pranohet plotësisht për zbatim në periudhën e ardhshme.