Четврток, 21 октомври 2021
Отворање на Конференцијата на претседатели на парламенти во Атина
Европската конференција на претседатели на парламенти која се одржува во Атина на 21 и 22 октомври, во организација на грчкиот парламент и Парламентарното собрание на Советот на Европа, на која учествува Претседателот на Собранието на Република Северна Македонија, г. Талат Џафери, ја отворија Претседателот на грчкиот парламент, г. Тасулас, Претседателот на Парламентарното собрание на Советот на Европа, г. Даемс и генералната секретарка на Советот на Европа, г-ѓа Пејчиновиќ Буриќ.
Воведничарите, изразувајќи задоволство поради физичкото присуство на 48 претседатели на парламенти, ја истакнаа важноста на темите за кои ќе се дебатира во текот на дводневниот самит и предлозите кои би требало да се упатат до владите за преземање на активности со цел надминување на денешните предизвици. Во однос на темата за споделување на искуства за предизвиците кои пандемијата со Ковид-19 ги наметна врз демократиите и за решавањето на слични кризи во иднина, беше подвлечена важноста на парламентите како гаранти на демократијата во време на криза и беше поздравен фактот што повеќето парламенти успееја да ги обезбедат неопходните прилагодувања на нивните правила и процедури со цел да продолжат да ги извршуваат уставните улоги за време на пандемијата.
Во освртот улогата на парламентите и правото на здрава и одржлива животна средина, беше упатен повик претставниците на законодавните домови да се заложат за усвојување на мерки со кои ќе се обезбеди правото на безбедна, чиста, здрава и одржлива животна средина, вклучително и преку дополнителен протокол кон Европската конвенција за човекови права, кој треба да биде правно обврзувачки за земјите членки. Експлицитното признавање на правото на здрава и одржлива животна средина во Европа како и во другите региони во светот, ќе го отвори патот за решителна акција и на европско и на национално ниво.
Според агендата, Претседателот Џафери ќе се обрати на вториот ден на Конференцијата, на темата „Заедничката иднина на сите европски граѓани“, а на маргините на Конференцијата предвидени се средби со домаќинот, претседателот на грчкиот парламент, г. Тасулас, и со потпретседателката на шведскиот парламент, г-ѓа Џонсон Форнаве.
Настанот во живо се пренесува на следниот линк: http://213.199.134.196:5080/LiveApp/play.html?name=408750284018018436762008