Понеделник, 5 ноември 2018 година
Пратеникот Бетиан Китев на Парламентарна конференција во Дубровник
Шефот на Делегацијата на Собранието на Република Македонија во Парламентарното собрание на Советот на Европа, Бетиан Китев, на 6 ноември 2018 година ќе учествува на Парламентарна конференција на тема „Градење на демократска безбедност на Медитеранот, заеднички предизвици, поделена одговорност“, која се одржува во Дубровник, Република Хрватска.
Конференцијата е во организација на Комисијата за политички прашања и демократија, во која членуваат шефовите на Делегациите на земјите членки на Парламентарното собрание на Советот на Европа, а агендата предвидува обраќања на претседателот на Парламентот на Хрватска, Гордан Јандроковиќ; претседателката на Парламентарното собрание на Советот на Европа, Лилијан Мари Паскер, министерката за надворешни работи на Хрватска, Марија Пејчиновиќ-Буриќ; претседателот на Групата држави против корупцијата (ГРЕКО), Марин Мрчела; претседателот на Венецијанската комисија, Џани Букикио, и други.
Пратениците ќе дебатираат на неколку теми, и тоа за придонесот на Советот на Европа кон концептот за демократска безбедност, промовирањето на доброто владеење и механизмите и алатките на Советот на Европа за справување со заканите врз владеењето на правото, заштитата на човековите права и дерадикализацијата, зајакнувањето на демократските институции преку уставни и правни реформи, како и партнерството за демократија со Парламентарното собрание на Советот на Европа како платформа за меѓупарламентарна соработка.